Entrevista asoleyada n'InfoAndecha, muérganu escritu d'información d'Andecha Astur, nel so númberu 5, correspondiente al mes de Febreru de 2008. Reprodicía en Infoasturies.
El candidatu al congresu, Bruno Gómez nació en Xixón, tien 25 años y ye Téunicu Superior n'Animación d'Actividaes Fisico-deportives y miebru de la organización xuvenil Darréu y del sindicatu CSI.
Pela so parte, Pablo Pérez, candidatu al Senáu, ye Llicenciáu en Bioloxía y ye miembru tamién de Darréu y preside l'Asociación Cultural Bilortu. Ambos con cuasi una decena d'años de trabayu n'Andecha Astur.
¿Por qué se presenta Andecha Astur a estes elleiciones?
Bruno Gómez: en cada foru , en cada alderique, en cada procesu onde’l futuru del nuesu país tea en xuegu, la izquierda nacionaliega tien de tar presente apurriendo’l so discursu firme y coherente na defensa de los nuesos intereses y drechos comu presones y comu pueblu. Cada asturiana y asturianu que creya nuna Asturies estremada, con capacidá d’escoyer llibremente el so futuru, onde se sofite y s’afale la llingua y cultura propies, onde se puea vivir y trabayar dignamente, una Asturies onde los intereses económicos nun desanicien el padrimoniu natural y cultural, un país de ciudadanos y ciudadanes llibres, esos asturianos y asturianes tienen el drechu a tener un opción política que los represente y seya vocera del so naguar. Esa organización política ye Andecha Astur.
Pablo Pérez: coincido con Bruno, y prestaríame amestar, amás, qu’Andecha Astur preséntase a les elleiciones estatales col enfotu de qu’aquelles persones que creyan nun modelu de facer política que consiste en vivir pa la política y non de la mesma, n’emancipase y formase y non en manipular y delegar, puedan votar y sentise dignos cola so decisión, torgando’l cayer na tentación de votar a partíos-empresa que saben que nun los representen pero que, a falta d’otra cosa... Poro, dirixímonos al Pueblu Trabayador Asturianu horizontalmente, cara a cara, ensin tapuxos nin elleutoralismos.
¿Cómu se ve dende la mocedá la situación d’Asturies?
Bruno Gómez: la mocedá asturiano vive una situación perdifícil ya que nun solo carez los problemes y la falta de drechos común al restu d’asturianos y asturianes, sinón qu’arriendes d’ello, ye víctima cimera de la llaceriosa situación llaboral na que mos atopamos. A los miles de mozos y moces que ca añu se ven obligaos a colar d’Asturies a la gueta d’un trabayu pa poder vivir y que son despreciaos y humildaos pol gobiernín de turnu hai que sumar otros miles que, trabayando n’Asturies, ven comu la precariedá, la esplotación y la discriminación sesista que carecen, xunto col preciu descomanáu de la vivienda y los bienes de primera necesidá, impíde-yos emancipase y tener una vida digna. Como militante d’Andecha Astur, y tamién de Darréu, afalo a la mocedá a organizase y lluchar persabiendo que’l futuru del nuesu pueblu decídese anguañu y que dende una mocedá comprometío y puxante podemos empobinalu haza los finxos de la soberanía nacional y la xusticia social.
Pablo Pérez: per un llau, hai que falar de cuála ye la situación d’Asturies y llueu de cómo la percibe la mocedá. La situación d’Asturies que se denucia ye básicamente’l desaniciu cultural y llaboral tanto nos aspeutos individuales (lo personal) comu colleutivos (comu pueblu), comu bien diz Bruno. Hai que dicir tamién que nun too ye prieto y entá tamos a tiempu d’iguar dalgunes coses, pero tiempu tampocu sobra. Sicasí, quiero poner enfotu en que tovía tenemos posibilidaes de construyir un futuru, pesie a los políticos que mos gobiernen n’Asturies y dende Madrí, y en dengún casu gracies a ellos. La mocedá nun ye un coleutivu homoxéneu, polo que voi retrucar qué ye lo que creyo que piensa la mocedá a la qu’Andecha Astur, y Darréu, mos diriximos, que ye la mocedá revolucionario, la qu’enfrenta y non afronta la rialidá na que vive, la que tien el determín de cambiala. Esta mocedá creyo que tea pensando coses tipu: ¿cómu da-y rempuesta a esta situación?, ¿cómu facer qu’esto cambie mentantu vivo y sobrevivo, y me formo y me preparo?, ¿cómu desplazar del poder a los poderosos?, ¿cómu facelo y nun ser aplastáu pol sistema?, ¿ónde y cómu puedo aportar el mio granín d’arena pa tresformar esta realidá?. Imaxino qu’estes sedrán delles de les entrugues qu’anden pela tiesta de la mocedá revolucionario mentantu enfrenten les milenta lluches personales que mos afeuten a toes, y el acosu d’una sociedá capitalista que-yos dexise parir una solución pa seguir calteniendo una corte de bárbaros espoliadores. Lo que tengo ñidio ye que, amás de pensar nestes coses, la mocedá revolucionario ta faciendo y ta organizándose: xorrez la música peles cunetes, hai lliteratura a maza martiellu, les paredes falen, les cais berren…
Pa finar, ¿Por qué hai que votar a Andecha Astur?
Bruno Gómez: cada votu a Andecha Astur supón un sofitu nidiu y rotundu a un proyeutu asturianu y d’izquierdes dafechu p’Asturies. Un proyeutu coherente y constante que, lloñe del posibilismu y l’entreguismu, faiga frente al de los partíos sucursalistes que, defendiendo intereses ayenos, planifiquen les polítiques qu’alluguen a Asturies nesta llaceriosa situación identitaria, económica, llaboral y social. Cada votu afita inequívocamente la esistencia d’un asturianu o una asturiana qu’apuesta por un cambiu fonderu y representa la dignidá de los que nun se van quedar de brazos cruciaos mientres nos anulen comu pueblu y persones.
Pablo Pérez: personalmente tengo que dicir que votar a Andecha por sí solo nun ye denguna solución pa nada. Sonará raro, máxime cuando me presento comu candidatu al Senáu, pero nun son votos lo que necesitamos nesti país, sinón llibertaes y drechos. Anque sacáremos los 8 diputaos que-mos correspuenden nel Congresu y los 4 senaores pal Senáu, ¿qué cambiaría?. Obviamente habría más capacidá de trabayu y de dar en focicu a tolos espoliadores que-mos vinieren tiranizando, pero lo que rialmente se necesita ye un compromisu diariu pa con un proyeutu de construición d’una Asturies soberana y socialista, con un pueblu trabayaor emancipáu, consciente y críticu que seya capaz d’espresar la so voz y realizar el so proyeutu. Y n’eso tamos n’Andecha Astur, tratando de servir de megáfonu d’esa voz que nun ye la d’Andecha sinón la del Pueblu Trabayaor Asturianu y tratando de servir de preséu pala tresformación social que necesariamente hai qu’afrontar. Agora, dempués de lo dicho, sí tengo que contestar por qué hai que votar a Andecha: diría que porque ye la única organización política que nun trata de representar al pueblu trabayaor, sinón de que se represente él mesmu y porque n’Andecha Astur tamos más esmolecíos por formanos pa saber facer, pa poder tresformar braeramente la sociedá, que pa gobernar pol meru fechu d’alministrar puestinos y perres
Esbilla
del.icio.us
La polémica ta servía nel primer aniversariu de "Laboral Ciudad de la Cultura". Andecha Astur vien d'amestase a les dures crítiques emitíes por estremaos profesionales del teatru asturianu, que non solo denunciaren qu’el proyeutu de Laboral Escena, dirixíu por Mateo Feijoo, ye elitista y entá nun foi a aconceyar a más de mediu centenar de presones nos sos espeutáculos y que a estes feches entá nun implicó nel so proyeutu a denguna compañía profesional de teatru asturiana los fechos enantes remarcaos, sinon que solliñaren «la indiferencia rayana nel despreciu más asolutu» col que son trataos, y la contradición esistente ente los términos «Laboral» y «asturiano», fasta’l puntu de llegar a coproducir con compañíes gallegues y non asturianes. 
Una delegación de 
