Articulu d'Antón Martínez* n'INFOASTURIES

Nunes elleiciones españoles como les que nos vienen, la posición de cualesquier organización política pequeña, como Andecha Astur, y d’ámbitu non estatal ye perdificil. Na mareona bipartidista, y bipersonal (ZP vs RJ), xabaz, con millones d’euros invertíos nel sistema ellectoral del espectáculu y la industria del votu.

Nun ye fácil la posición d’una organización política, asturiana d’izquierda tresformadora y nacionaliega. Les cais y los mass-media yá tan entamando a enllenáse coles grandes campañes publicitaries que los Partíos-Empresa espanden de la so “ganga”, ente los potenciales consumidores, nel mes de les “Rebaxes”… Nuna sociedá desideoloxizada y teledirixía ye perdificil facer llegar una propuesta política alternativa con carga ideolóxica, más cuando aporten procesos ellectorales de “turnu pacíficu” de la II Restauración,…

La misión d’una organización como Andecha Astur, con unos entamos ideolóxicos claros:

Andecha Astur entiende qu’Asturies “ye una nación” y que-y “asiste’l derechu d’autodetermín”, quier la “soberanía del Pueblu Asturianu y de les sos instituciones”, soberanía que pasa por “recuperar la capacidá y el poder políticu afayaizu pa garantizar la reconstrucción d’Asturies en toles estayes” queriendo “algamar un sistema xustu y llibre onde les clases populares y trabayadores protagonicen una fonda tresformación que les empobine haza’l so progresu nuna sociedá socialista, igualitaria, non sesista, desmilitarizada, ecolóxica y con especial precuru haza los sectores qu’anguaño s’atopen marxinaos o amenorgaos”. Andecha Astur sopeléxase “antimilitarista”, implicada activamente na “defensa ecolóxica d’Asturies” y “escontra dafechu de cualesquier sistema productivu sofitáu na esplotación irracional de la ñatura, del xorrecimientu cuantitativu de la producción col únicu finxu d’acumular beneficios económicos y del fomentu del consumu escomanáu”. Andecha Astur ye una organización política asturiana “solidaria colos derechos y llibertaes individuales y coleutives recoyíes nes estremaes Declaraciones de Drechos Humanos y de los Pueblos”. Ye una organización “internacionaliega qu’afita la so solidariedá con tolos Pueblos de la Tierra, mui especialmente coles naciones sin Estáu y los países que tan siendo espoliaos”. Una organización política que “sopelexa’l respetu a les estremaes tribes de rellación afeutiva y sesual y el reconocimientu llegal de cualesquier situación de convivencia social afeutiva a efectos d’exercer y esfrutar de los mesmos derechos que les persones heterosexuales” y que tará siempre “a la escontra de los entamos patriarcales, sesistes y machistes qu’ispiren esta sociedá”.

Como dicíemos, una organización política como Andecha Astur con un proyectu afitáu nunos entamos ideolóxicos claros y mínimos, que la enmarquen como una organización soberanista y de clase, internacionalista, antimilitarista, y solidaria colos derechos y llibertaes individuales y coleutivos. Una organización política que siendo realistes, pel momentu, nun va sacar 100.000 votos y representación nel Parllamentu español ta perclaro que’l programa que presenta a les elleiciones ye’l so propiu proyectu políticu, por que lu tien, definíu ideolóxicamente nos sos entamos, presenta la so propia ideoloxía y el so oxetivu tien que ser dar la posibilidá a los que lu comparten de poder facer un votu de protesta asturianu y socialista, de siguir intentando qu’espoxigue y que cale na sociedá la ideoloxía que defende, pel momentu minoritaria n’Asturies, y siguir afondando na creación d’un movimientu nacional afitáu nel protagonismu de les clases populares y trabayadores nes fondes tresformaciones sociales necesaries que nos empobinen faza una Asturies socialista, xusta y llibre. Y ye que nun pue ser otru, nesti y en cualesquier procesu elleutoral y tien que ser anque Andecha Astur tuviere posibilidaes reales de sacar representación. Y ye que cualquier posible actuación d’un representante d’Andecha Astur va tar dientro d’esi marcu y con esos oxetivos a algamar. Nun puen ser otros.

La participación nes instituciones burgueses, del Estáu burgués-capitalista (lliberal y centralista) y coles sos regles, basaes obviamente nos sos intereses, antagónicos per se a los intereses de les clases populares y trabayadores y de los derechos de la Nación Asturiana (y les demás naciones), tienen que tener un oxetivu claru pa nun ser una parte más d’esti sistema inxustu, una parte más del problema, del circu.

Esta participación y el posible algame de representación institucional, tien que ser un frente más de llucha p’algamar los oxetivos y esta participación, tanto si se pue sacar representación como si se saca o nun se pue sacar, tien que ser pa facer esporpollar los conflictos sociales y nacionales esistentes, afondando nes graves contradicciones ya inxusticies del sistema, afitando’l so calter alternativu, vindicativu y combativu.

La participación nunes elleiciones tien que ser un episodiu más dientro de l’actividá intensa d’axitación y propaganda y de formulación d’alternatives polítiques d’izquierda tresformadora (nos conceyos, a nivel nacional o cualesquier foru onde haiga decisiones qu'afeuten a Asturies), fuxendo del reformismu posibilista simplayu, que nun dexa de ser una parte más del problema, una torniellu más qu’afita otru poquiñín más la máquina, llexitimándola. Hai que fuxir d’esta tendencia que namás desnaturaliza lo que tien que ser un movimientu políticu, social y cultural, verdaderamente tresformador, d’izquierdes y consecuente cola custión nacional asturiana.

La participación d’estilu “tradicional”, usada polos partíos del sistema llamaos “tradicionales” (PP-PSOE-IU), y qu’otros partíos/coaliciones asturianos, que se dicen d’izquierdes o alternativos, reproducen sistemáticamente “intentando ser como ellos” trae usar unes táctiques y maneres como les d’ellos. Entrar nel circu a engañar. Y ye qu’hai una tendencia en sectores fácilmente llocalizables de la izquierda asturiana haza lo que piensen que ye la “política seria” que nun ye otra que la tradicional, que por cierto ta perbién representada yá con PP, PSOE ya IU, pues escoyer el perru col collar del color que quieras, cubriendo práuticamente tol espectru políticu, a tolos posibles consumidores.

El ser participe del “circu mediáticu” reproduciendo los estereotipos del partíu burgués, del too vale por un puñáu de votos, anque seyan engañaos, l’estilu del posibilismu, del cartelín “seriu”, del programín progre de “rebaxes” pa que “nun asuste”, con un enfotu namás qu’ellectoralista, del algame de representación como oxetivu y non como una ferramienta más, con etiquetes vacíes de conteníos y lo más comerciales posible, faciendo maquinaciones y esperimentos, sin una mínima visión de movimientu social alternativu, namás con una visión d’axente ellectoral, de xestor de recursos, de comercial d’una marca “guapa”, cola to publicidá engañosa…Esto nun fai más que convertite n’otru meru axente de la sociedá-espectáculu y, poro, otru meru axente del sistema establecíu, el que precisamente la izquierda rialmente tresformadora nun quier y combate.

¿De que val xugar a partíu-empresa engaña consumidores con mensaxes de fumu cuando hai otru partíu-empresa que vendi'l mesmu productu que tu, que tien el mesmu slogan que tu, pero que ye una “multinacional”? Hai qu’entruga-yoslo a ellos, a los que-yos presta xugar a ser políticos burgueses y se ponen les etiquetes comerciales enriba, que faigan falta y según el momentu: un día soi verde, al otru asturianista o si fai falta namás nacionalista y…

Ente la prostitución de la política que representen estes opciones, son necesaries opciones coherentes y sinceres, que nun escuenden los sos oxetivos y que los tienen claros. Que quieren tresformar la sociedá dende la sociedá y non dende la poltrona y qu’ella te tresforme, faciéndote perder l’horizonte, perdiendo de vista los propios oxetivos. En más de lo mesmo.

Estes tendencies son peligroses y ye posible qu’en dalgún momentu puntual la propia Andecha Astur cayere nesti xuegu por mor de sinerxíes internes desnaturalizadores del propiu proyectu, de l’aición de persones que posiblemente nun creyíen nél o nin siquiera lu compartíen. Pese a esto, la trayectoria d’Andecha Astur dende qu’entamó ye clara nesti sen. Queremos convencer y non que nos convenzan ya que nos alcontramos nuna llucha ideolóxica desigual contra les fuercies alienadores del sistema.

Tornando un poco al títulu del artículu, después d’estes reflexones, camiento qu’Andecha Astur ye y foi siempre una opción soberanista y de clase, que nun escuende lo que ye, nin escuende polo que llucha y que tien l’aval del trabayu nesta dirección dende’l so entamu. Ye la opción clara de los que consideramos qu’Asturies ye una nación, que creyemos posible una República Asturiana nuna sociedá xusta, igualitaria, sin clases y socialista. Ye la opción de los que nun tragamos con esti sistema, nin queremos ser un axente del, de los que tenemos de referencia a les clases populares y los trabayadores, de los que creemos necesariu un movimientu asturianu de lliberación social y nacional, que nos faiga avanzar faza la emancipación.

Una opción d’izquierda nacionaliega, un nacionalismu entendíu pa la defensa de los derechos nacionales, como l’autodetermín, que como a toa nación-y correspuenden a Asturies de forma inalienable permanente ya irrenunciable y la defensa de la cultura nacional asturiana, en tolos ámbitos. Poro, un posicionamientu nacionalista estratéxicu que s’aposienta nel marcu d’un partíu netamente d’izquierdes, internacionalista y solidariu con tolos Pueblos de la Tierra. Too ello, nun contestu como’l d’anguañu de peligru d’esistencia de la propia Nación Asturiana y de los sos rasgos carauterísticos. Poro, nun se trata d’un nacionalismu escluyente y que busque privilexos nacionales y/o privilexos pa la burguesía asturiana. Trátase de la defensa de la esistencia de la propia nación Asturiana, dende una perspectiva de clase y col enfotu d’algamar una sociedá llibre, xusta, igualitaria y socialista. Somos nacionalistes por obligación, nel contestu d’asimilación social y nacional del Estáu español y na falta de reconocencia d’Asturies como nación y de la negación de los sos derechos.

Por too ello, nes prósimes elleiciones de marzu hai una alternativa con unos oxetivos claros, que tien bien nidio pa que quier representación nes instituciones y como la quier sacar, una opción clara pa los asturianos que creyemos que ye posible una tresformación social fondera y entendemos a Asturies como la nuesa nación (cola so cultura, historia,…) y que la consideramos el nuesu marcu específicu de llucha de clases, pa los que nos consideramos internacionalistes y solidarios, que defendemos ecolóxicamente Asturies, pa los que somos d’izquierda y creyemos nun proyeutu afitáu nel protagonismu de les clases populares y trabayadores que nos empobine a la emancipación social y nacional.

Tenemos una opción clara y sincera que fuxe del posibilismu reformista, que nun ye más que’l pasu anterior a la traición d’unos ideales, y esta ye: Andecha Astur, una opción soberanista y de clase. Y ye que votar a Andecha Astur nun ye votar a un partíu cualquiera, una marca, ye un votu que diz muncho, que sinifica munches coses y que, sobre too, amuesa una opción de resistencia, de protesta y antisistema. Y por que non, radical, por que va al raigañu los problemas. Votar Andecha Astur ye votar a la Izquierda d’Asturies. Pa más de lo mesmo yá tan los demás.

* (Ferrol, 1980). Llicenciáu n'Hestoria.