Esti sábadu pasáu, Arturu X. Bermeyu, Secretariu Xeneral d’Andecha Astur, y Pablo Pérez, candidatu al Senáu, aconceyaren col eurodiputáu Mikel Irujo pa "facer un repasu de la situación na que s’afayen los temes que se tan llevando nel Parllamentu Européu, apurrí-y les novedaes caberes y estudiar posibles víes d’actuación a siguir".

Ente les custiones trataes nel conceyu destacó lo rellativo al Plán Enerxéticu del “Principado”, les llinies d’Alta Tensión, les inregularidaes na financiación de l’ampliación d’El Musel, el banzáu de Caliao, el tresvase d’Arbón, el proyeutu de regasificadora, la Zalia de San Andrés de los Tacones y la “plantona” de Xixón, tresnándose pa estos dos últimos casos "sendes intervenciones nel parllamentu européu de les que prósimamente daremos anuncia", informen dende Andecha Astur. La organización asturiana destacó "la perbona dimposición" del eurodiputáu de la coalición "Europa de los Pueblos", Mikel Irujo y espera que " d'equí a pocu vaigan viéndose resultaos de les iniciatives europees qu'Andecha Astur lleva alantre al traviés d'elli".

Fonte: Infoasturies