La polémica ta servía nel primer aniversariu de "Laboral Ciudad de la Cultura". Andecha Astur vien d'amestase a les dures crítiques emitíes por estremaos profesionales del teatru asturianu, que non solo denunciaren qu’el proyeutu de Laboral Escena, dirixíu por Mateo Feijoo, ye elitista y entá nun foi a aconceyar a más de mediu centenar de presones nos sos espeutáculos y que a estes feches entá nun implicó nel so proyeutu a denguna compañía profesional de teatru asturiana los fechos enantes remarcaos, sinon que solliñaren «la indiferencia rayana nel despreciu más asolutu» col que son trataos, y la contradición esistente ente los términos «Laboral» y «asturiano», fasta’l puntu de llegar a coproducir con compañíes gallegues y non asturianes.

Andecha Astur denuncia una programación elitista y asturianófoba y atalanta que tala filosofía, propia del PSOE n’Asturies, parte de la bas de que ná asturiano ye bono, nin la nuesa cultura nin los nuesos profesionales, entrando na dinámica -tamién denunciada polos profesionales asturianos del teatru- de formar a xóvenes actores y actrices, músicos o baillarines, pa llueu obligalos a emigrar, mentes «Laboral Escena» absorve una gran parte del presupuestu asturianu de cultura pa pagar y desendolcar les artes escéniques d’otres comunidaes del Estáu español.

D'otra miente Andecha Astur camienta que, siendo la Llaboral l’únicu teatru «autonómicu» esistente n’Asturies y las especiales carauterístiques que reune, faenlu idóniu p’aniciar un Cientru Dramáticu Nacional Asturianu que dea xuéu y puxu a toles enerxíes creatives esistentes n’Asturies, plantegándose tanto la proyeición de produciones propies comu l’aniciu y ampliación de públicos tanto del nuesu país comu de fuera del mesmu. Parezmos una propuesta perbona reclamar la Llaboral comu sitiu perafayaizu pal aniciu d’un Cientru Dramáticu Nacional Asturianu.

SI AL CENTRU DRAMATICU NACIONAL ASTURIANU
NOIN A PROYEUTOS ELITISTES Y ASTURIANOFOBOS.